李思捷喺《福禄寿》恶搞陈伟霆（ William），将佢首《 Taxi》改版做《 Twinz》，入面嘅歌词抵死啜核，寸爆 William同阿 Sa呢段姊弟恋，最抵死系好多网友睇完激赞。 「佢唔了解我」 不过当事人 William就唔多钟意，噚日佢同江若琳、吕慧仪等一班艺人出席《欢乐满东华》记招，讲到李思捷扮佢扮到出神入化，一开始佢都表现大方，话冇唔开心，仲有兴趣睇吓个 MV：「冇问题，个节目都系娱乐性质，最紧要大家睇得开心。」呢个节目系无线出品， William有苦自己知，想嬲都唔敢嬲出面喇！佢乐乐大方咁话：「唔关事，我都钟意睇《福禄寿》。」讲到歌词暗指 William钟意阿 Sa结过婚又有金，仲一齐玩脚趾， Sa姐又爱 call班狗仔队等等， William终于忍唔住笑住反击：「我同李思捷唔熟，我觉得佢唔系几了解我，系咪恶意中伤都要返去睇吓先知！」 自认跳舞劲嘅 William仲不忘揶揄李思捷：「如果佢扮我的话，我觉得佢跳舞要好好！」最后 William留言叫李思捷唔好追住佢玩，一次就够喇！佢话：「我都唔想再回应咁多！」